Anders.

Sy de voorgegeven liny verdacht te strecken door beyde punten A en C. Hierom om op deselve een recht-staende liny te trecken / so salmen CD dobbel nemen met CA, en uyt D naer gevallen trecken de liny DBE, en in deselve nemen DB gelijck DA: ofte / als in de 2^de figuer / uyt C naer gevallen trecken de liny CB, en in deselve nemen CB gelijck CA, en halen de liny DBE. Daer na nemende EB gelijck BD, so treckt beyde linien EC en BAH, die malkander doorsnijden in F: dan sal / somen in d' 1^ste figuer AH gelijck neemt aen AD ; ofte / als in de 2^de figuer / AH gelijck aen AC / en voorts AG gelijck maekt aen AF, en treckt GH, deselve rechtstandich zijn op AC.

Om 't werck te bewijsen / soo sy in d' 1^ste fig. getrocken de liny DF.

Aengesien dan de liny BA door de liny EC in yder figuer op deselve wijz als in d' 1^ste manier van't 2^de Werckstuck in F gedeelt is in twee gelijcke deelen / en door 't Werck BD in d' 1^ste fig. gelijck is aen DA, en voorts DF beyde driehoecken BDF en FDA ghemeen is: so sal mede f den hoeck BFD gelijck zijn den hoeck DFA, en oversulcx g yder een rechten hoeck wesen. Op de selve manier sullen mede de hoecken BFC en CFA in de 2^de figuer elck een rechten hoeck zijn. Hierom / dewijl in d'1^ste fig. h den hoeck DAF des driehoecks DAF ghelijck is den hoeck HAG des driehoecks HAG, ende mede de hoeck-syden DA, AF aen de hoeck-syden HA, AG d'een d'ander gelijck zijn: so volgt i dat insgelijcx de hoecken DFA en G malkander sullen gelijck wesen. Nu is den hoeck DFA recht betoont. Waerom dan oock den hoeck G recht is: en oversulcx GH rechtstandich op AC. Om deselve reden sal mede den hoeck G in de 2^de figuer aen den rechten hoeck CFA gelijck wesen: en daerom GH rechtstandigh op AC. 't Welck te doen was.

V. WERCK-