Extract vande Previlegie.

De Staten Generael der vereenichde Nederlanden hebben gheconsenteert ende gheoctroyeert, consenteren ender octroyeren mits-desen Iohan Sems burgher tot Leeuvvaerden, ende Ian Pietersz. Dou gheboren burger ende wijnroeyer der stadt Leyden, alleen binnen den tijt van seven naestcomende jaren inde voorschreven vereenichde Nederlanden te mogen doen drucken, uytgeven ende vercoopen seecker boeck by hun ghemaect, geintituleert Practijck des Lantmetens, waer in geleert wort alle landen te meten, ende te deelen met eenige Tafelen daer toe dienende. Desghelijcx alle lengten, breeden, wijden, hoochten ende diepten af te meten, 'tsy door calculatie ofte sonder calculatie: Item Caerten maken, ende meer ander constighe stucken der Geometrie belanghende. Verbiedende alle ende eenen yegelicken den voorschreven Boeck int gheheel ofte in deel binnen den voorseyden tijt van seven jaren na te druck‾e, ofte buyten de vereenichde Landen na ghedruct, inde selve te vercopen sonder consent vande voornoemde Iohan Sems ende Ian Pietersz. Dou, opte verbeurre vande naghedructe Exemplaren, ende daerenboven noch een seeckere somme van penninghen, sulcx blijckende by de inscriptie hun daer van verleent. Ghedaen in sGravenhaghe den xxiij^en Martij, Anno 1600. Was onderteyckent.
E. vander Burch. vt
Noch leegher stont,
Ter ordonnantie vande selve Heeren Staten Generael,
C. Aerssen.