ren vvaer uyt voorts d'Ægyptenaers door groot‾e noot (om te deel‾e e‾n scheyden hare landen ende erven, vviens merck-teecken‾e doort overvloeyen der riviere Nylus, jaerlicx vverden vvech genomen e‾n met slick bedect,) hare Priesteren, als hebbende den meest‾e bequamen leegen tijt, doen practiseeren seeckere regelen vvaer door (naer dat de vvateren der riviere vveder afgelopen vvaren,) yder sijne landen vveder mochten toegemeten vvorden, om also te verhinderen alle moeyte, questien, processen, ja dootslaghen ende andere ongevallen die daer uyt souden moghen ontstaen.

Ende alsoo vvy over eenige jaren ons inde Mathematische disciplijnen geoeffent hebben, e‾n verscheyden saken zijn vvijs gevvorden (e‾n na dat d‾e hooch-vvijsen Philosophe, e‾n alder vvelsprekenste Orator M.T. Cicero ons betuycht, dat vvy menschen niet alleen voor ons selven, dat is, voor ons eyghen profijt gheboren zijn, maer oock om malcanderen te helpen met diensten, gaven, ontfanghen, jae oock met consten, arbeyt, e‾n goeden:) VVaer door vvy eyntlick‾e zijn geresolveert gevvord‾e (op dat vvy ons leven niet met stil-svvijgen souden door brengen, gelijck de onredelicke Dieren doen) yets tot dienst onsens Vaderlants, ende des const liefhebbers te schrijven, (doch slecht e‾n eenvoudich sonder groote vvelsprekentheyt daer in te gebruyck‾e, ons alleene genoech zijnde de const so de selve is met clare vvoorden voor te stellen.) E‾n ons bedenckende vvat vvy souden mogen voort brengen daer 'tgemeene beste meest mede soude mogen vverden ghedient. So hebben vvy, aenmerckende de groote slechticheyt van sommige Lantmeters hier te Lande, (vvy en segg‾e niet van alle, vvant de verstandige en vvillen vvy hier mede niet gemeent hebben,) hoevvel vvy vvel gelooven datmen daer vveynich soude vinden, ofte haer is vvel bekent dat soomen in eenen rechtsijdigen driehoec multipliceert de helft der parpendiculaer linie met den Basis, of den halven Basis met de geheele parpendiculaer linie, dat 'tproduct moet uyt brengen het Aream superficalem des selven triangels: maer somen haer vraecht vvaeromme sulcx noodich also moet geschieden, so salmen daer vele vind‾e, die van dese slechte sake geen reden connen gheven, veel min sullen sy connen demonstreeren, uyt vvat oorsake dat vande helft der drie zijden eens recht-

sijdighen