hoe hy alle rechtsijdige e‾n cromsijdige land‾e, 'tzy beganckelick ofte onbeganckelick sal meten (daer toe calculeerende diversche tafelen met grooten arbeyt, vvaer door men lichtelick‾e can meten alle circkelbogen, daert tot desen tijt niet heeft mogen volbracht vverd‾e als door grooten arbeyt (als in vrscheyd‾e Auctoren te sien is,) vvaer in alle rechtervaren deser const ons getuychnisse sullen gheven,) ende voorts hoemen alle landen, sy zijn geformeert so sy mogen voorcomen, constelicken sal deelen, 'tsy in gelijcke of onghelijcke deelen, met rechte of cromme scheyt-linien, lopende evenvvijdich ofte onevenvvijdich, e‾n mede uyt puncten staende binnen of buyt‾e 'tlant, op verscheyden manieren, naer der goeder luyden ghelieven.

Devvijle nu Hooch-geboren Doorluchtige Vorst, vvy vvel versekert zijn, dat uvve Vorstelicke Genade een sonderlinge geneuchte e‾n grooten lust hebt tot alle vrye consten, e‾n ghy Edele E. VV. Heeren niet alleene zijt beminders der selven, maer mede als d‾e vvijsen voorsieningen zijt voorstanders van alle geleertheyt, consten e‾n goede ordinantien: So hebben vvy ons verstout dit onse tegenvvoordige vverck V.Ex^tie, ende uvver E. VV. Heeren te presenteren e‾n dediceeren, met alle behoorlicke reverentie. E‾n so vvy bekennen desen onsen arbeyt V.Ex^tie ende uvver E.VV. aengenaem te vvesen, so sullen vvy daer door veroorsaect vvorden (met der hulpe Gods) yet anders int licht te brengen, 'tvvelck niet en sal zijn van minder profijt ende vernoeghen. Hier mede V.Ex^tie ende E.VV. seer voorsienighe Heeren den almachtighen God die aller Overicheyt verstant ende vvijsheyt gheeft, in sijn bescherminge ende beschuttinge bevelende, hem biddende dat hem ghelieve V.Ex^tie, Edele E.VV. seer voorsienige Heeren mede te deelen sijnen Geest ende vvijsheyt, om vvel te continueeren V.E. ghelucsalige regeeringe.
In Leyden desen elfsten October Anno 1600.

V. Vorstelicke Ghen.
ende V.E.
onderdanighe dienaers
Iohan Sems ende
Ian Pietersz. Dou.