te wesen, ende hoemen 'tselve opt lant sal ghebruycken, als te weten hoemen de formen der landen sal uyt-teyckenen, ende in drie ofte vier hoecken verdeelen ende onderscheyden, ende volgens de parpendiculare linien vinden (mettet winckel-cruys,) ende de selve ende alle rechte ende cromme linien met den keten ende roede meten: verhalende oock waer een Lantmeter hem moet wachten, so wel voor 'tbedroch der personen daermne inde metinghe mede te doen heeft, als voor de bedriechlickheyt des lants. Item hoemen een stuck lants sal in een drie ofte vierhoec besluyten: Ende ten laetsten hoemen een Quadrant sal maecken, ende de grootheyt des lants hoecken daer mede afsien.

Int tweede deel sullen wy leeren den inhout vinden van alle landen hoe die geformeert mogen wesen, rechtsijdich of cromsijdich, rechtsijdich als drie, vier ofte meer hoeckige landen, cromsijdich als Circkels, Cirkelbogen, formen met Circkelronde boghen besloten zijnde, ende met rechte ende cromme zijden 'tsamen, sullen oock beneffens 'tcalculeren des lants inhout leeren vinden verscheyden linien (ofte uytwendige zijden) als parpendicularen, Diameters, Circumferens, Bogen, Pijlen, Pesen, ende meer andere linien, 'tzij door tafelen ofte sonder de selve, na ghelegentheyt der saecken. De onbeganckelicke landen sullen door de grootheyt der hoecken, ende meer andere constighe weghen.

Int derde ende laetste deel sullen wy constelick leeren deel‾e ende scheyden alle rechtsijdighe ende cromsijdighe landen, t'zy in ghelijcke ofte onghelijcke deelen, met rechte ofte cromme scheytlinien lopende evenwijdich ofte onevenwijdich, ende mede uyt puncten staende binnen ofte buyten 'tlant, ende comeende aen diversche weghen.

Ten laetsten volcht een Appendix, waer in gheleeert wort so wel de maten der supersitien, als lengten van d'een contreye op d'ander verander‾ede. Neemt dit alles te‾e best‾e, beminde Leser, ende verwacht hier mede met ons 'tgene Meester Ludolph van Ceulen, Meester Symon Stevin, ende Meester Samuel Crop, Ingenieur van sijn Excellentie, van de Mathematische consten (wil God) int licht sullen brengen. Vaert wel.